Récit de la vie d'une famille de mineur Pierre Paillot dit " tiot Pierrot "

Récit avec l'accord de sa fille Annie               Retour Accueil

Autre récit de Pierre donné par son autre fille D.Lamarre-Paillot sur la catastrophe de Fouquières ICI

Pour ceux qui ont des problèmes de compréhension passez dessus vous aurez la traduction

Présentation 

Chapitre 1 2 3 4 5 6 7 8 9 10 11 12 13

Tiot Pierrot

min pére mineur ed fond y'est mort y'a bétot neuf ans, il aimot bien écrire ses souv'nirs su des cahiers et su chti qu'j'ai in mains i parlot de s'petite infance d'1925 a 1930

j'vas vous l'raconter in plusieurs fos mais dites vous bin qu'ch'est min papa qui parle
ch'est dins eune cité minière par un fro jour ed décembre, que m'n'histoire al a comminché

eune femme al dit à s'n'homme "Henri va caire Julie l'sache femme surtout traine pas in route"

Julie Gambier l'sache femme
et ch'l'homme i est parti dins l'noir in laichant s'femme et ses deux tiots, chétot em'mére Louise et mes fréres Gaston et Jean, in éto l'sept décembre 1925 , et j'sus v'nu au monde dins l'anonymat et l'indifférence

y'a pas gramin d'voisins qui zont sonné à l'porte, faut dire qu'in n'avot pas d'sonnette, vu qu'in n'avot pas core l'éléctricité et l'iau courante dins chés maisons
c'qui reste de ch'jour là ch'est deux lignes su l'état civil de ch'journal "le réveil du nord", et min pére bin éméché et l'casquette ed travers aprés l'déclaration à l'mairie

à dix huit jours à dire in m'aurot p't'étre app'lé Noël, mais là j'ai hérité des prénoms d'mes mononques Pierre et Joseph , j'avo soit disant réussi m'n'intrée dins l'monde, mais cha ch'est eune autre histoire!!!!

 

Tiot Pierrot 1

ché toudis papa qui parle !!

Em'mére al m'a dit qu'j'ai toudis été sache, in aurot dit que j'faigeo min possipe pour pas y donner trop d'traval, in m'intindot pas braire,

j'avo toudis l'sourire et j'avalo sans rin dire, l'bouillie d'pain dins du lait qu'al mettot din min bib'ron

in ch'temps là y'avot gramin d'naissances dinch' villache, chétot l'aprés guerre "dins eune forét quand in abat des arbres y faut in r'planter"

et ichi y'avot gramin d'hommes disparus et y fallot r'faire eune population dins l'éventualité d'eune nouvelle guerre
j'vas vous parler d'not' intérieur, aprés in f'ra un tour à l'cour

l'maison al étot composée ed trois piéches in bas et deux piéches in haut,

l'hiver in étot gelés, pour tout l'maison y'avot qu'un poele in bas du qu'in brulot del'poussiére ed carbon et des chistes mélingés à eune paire ed gaillettes

 l'hiver ché carreaux y deg'lotent pas, et chétot dur de s'coucher in pan d'quémiche dins ché draps d'grosse toile glachés

al cour ché appuis d'fenètres i z'étotent plein d'poussières de ch'terril tout proche
ch'coron ou j'sus né i'étot composé d'six maisons et in étot 17 infants avec trois ou quatre ans ed différince !

j'vas vous décrire min lieu d'naissance

not'maison chétot l'premiére du coron, aussi avec el rue montante et ch'robinet à chinquante métres, tous ché iaux d'rinçache ed lessiffe al passotent devant l'porte ed devant!!

et dérriére in avot drot à chés iaux d'vaisselle, chés crottes ed lapin, chés restes ed vermicelle, tout cha à un metre de l'porte
y'avot pas l'iau dins chés maisons et pas d'éléctricité,

chés wc chétot des reservoirs à mouques l'été et des frigos l'hiver et eune fos par an fallot vider chel'fosse dins ch'gardin

comme vous veyez l'hygiéne al étot rudimintaire, mais in poussot quand méme!!!

 

 

Tiot Pierrot  2

 

in habitot l'cité du Transvaal à Fouquiéres

 

et derriére el maison in avot un tiot gardin bin intret'nu qui permettot à m'mére ed joindre les deux bouts

 chés fins d'quinzaine al z'étotent difficiles, min pére travaillot au jour et i gagnot pas grand cosse et i'avot l'déplorape habitude ed laicher des ardoises din chés z'estaminets à l'sortie d'sin boulot, et em'mére al devot les régler

al faigeot bin des lessiffes pour chés gins mais chétot mal payé et comme al avot trois tiots al étot obligée d'limiter sin traval

y'avot gramin d'ménaches qui acatotent à credit ed quoi s'nourrir, et ch'l'épicier i leur vindot tout plus cher

quand i fallot payer l'jour ed paie c'qu'in devot, chétot pas la misére mais presque, in faisot partie des gins pauvres

min pére i'etot courageux i travaillot, i'él'vot des lapins, i cultivot un camp, mais i buvot d'plus in plus, il étot pas méchant, mais il étot imbétant, i faigeot marcher fort tard ch'phonographe qu'not' grand mére al nous avot donné

mi j'peux dire que j'l'ai intindu l'canchon des blés d'or, sur chés bords de l'rivièra, l'angélus, j'les sais core par cœur

in plus il i fallo du pinard pou aller travailler ou bin i faigeot du raffut et y réclamot d'l'iau d'vie in rintrant

em 'mére al finichot par céder et avec mes fréres in allot chez zizine qui vindot des boissons avec des mesures in étain
j'peux bin l'dire ach't'heure al maison l'atmosphére al étot tell'mint mauvaise qu'in étot contints quand i faigeot bon in pouvot aller juer à l'cour !!

 

Tiot Pierrot 3

suite ed l'infance ed papa


al maison, min deuxiéme frère i est rintré à l'école, j'm'ar'trouvo seul avec em'mére aussi al m'inm'not su sin dos quand al avot des lessiffes et des ménaches à faire

la lessiveuse

al faigeot cinq ménaches par semaine et des lessiffes qu'al faigeot al maison et qu'al ram'not propres et r'passées à chés gins, et al étot souvint payée eune misére
ché ménaches chétot chez deux demoiselles d'école et quatre commerçants, j'aimo pas gramin aller avec elle, pourtant i n'a qui étotent gentils avec mi

ché z'institutrices al m'preparotent toudis des liffes d'images, des biscuits des bonbons ou des carrés d'chocolat
j'allo aussi chez des marchands d'quémiches et d'calçons, i z'étotent belges i s'app'lotent "Jules et Germaine" et i n'avotent pas d'infants
l'ménache d'aprés chétot eune jeune femme qui avot perdu sin fiancé pindant la guerre dins l'région et qui t'not eune tiote épic'rie, al avot préféré rester din l'région, passeque sin futur époux i avot été tué à Vimy

al étot douche avec nous et in veyot qu'al vénot d'eune famille aisée à s'façon d'parler et d's'habiller, sin pére y'éto directeur de l'banque d'Indochine à Saïgon
ch'quatriéme i étot commerçant dins l'ville à coté et i vindot de l'confection pour hommes, i étot fro et distant, à part bonjour et au revoir i nous adressot pas la parole aussi chétot long pour mi d'rester assis sur eune chaisse dins l'cuisine
j'ai gardé pou la fin ch'boucher de l'route nationale, là aussi j'éto inférmé dins eune tiote piéche à coté de l'grande cuisine dù qui découpotent el viande, tournotent chés patés et chés saucissons, cha sintot l'odeur fade de ch'sang

in plus y faigeot des tripes ed porc et i r'tournotent chés boyaux et i les lavotent à l' cour sous ch'robinet juste in d'sous de l'fenétre dù qu'j'éto

chés z'apprintis y z'avotent pas l'vie facile, ch'patron y'avot l'main et ch'coup d'pied lestes
quand i étot d'bon poil c'qui étot rare i faigeot cadeau d'eune tiéte ed porc ou d'mouton à m'mére c'qui pou nous améliorot l'ordinaire

et pourtant malgré sin courache et tous ses z'éfforts pour améliorer not' vie, chétot bin de l'peine pou peu d'résultats, min pére i dépinsot eune grosses partie de s'paie dins chés cafés, et m'mére al s'usot pou nous nourrir !!!

commerçants du cocorico

 

Tiot Pierrot 4

ché toudi papa qui a la parole
ché momints ed douceur al maison zétotent rares, mais quand min pére i étot d'l'aprés midi, alors in étot sur ed passer eune bonne soirée
em mére al allumot l'grosse lampe à pétrole, mes fréres i faigeotent leurs devoirs, mi j'avo eune vielle ardoise et j'écrivo les lettres et les numéros qu'min frére Gaston l'ainé y m'apprenot
maman al ar'prisot des cauchettes in cantant des canchons patriotiques ed l'époque, ou in parlot d'l'Alsace et d'Verdun, in étot bin , dins eune bonne imbiance, mais ché momints là i zétotent rares !!
un bon souv'nir pour mi, ch'est m'premiére hospitalisation, j'éto queu d'eune barrière su in morciau d'verre et j'avo eune joue bin intaillée, j'sus restée eune paire ed jours à l'hopital Ste Barbe, j'éto heureux,

 j'avo eune grante quémiche in toile blanque, ch'coiffeur i m'avot fait eune coupe ed cheveux fort courte, mi j'étos bin au caud, et ché soeurs infirmiéres al me soignotent bin et al zétotent gentilles avec mi et j'éto bin nourri
maman faigeot tout c'qu'al pouvo, mais al maison l'ordinaire chétot souvint l'soupe au lard gras (chétot l'moins ker) et quand al avo eune téte ed mouton aprés l'avoir cuite al tirot l'viante et al l'inringeot avec des haricots et cha cangeot,

ou alors in mettot des z'attrappes à moniaux , et quand in n'attrappot in les plumot et al nous faisot eune fricassée ed tiots zoziaux et chétot pas mauvais!!!

 

Tiot Pierrot 5

Suite de l'histoire de papa


in avot aussi des lapins, mais i zétotent réservés pou chés fêtes

chés frères et soeurs à maman i v'notent régulièr'mint al maison, aussi in faigeot cuire des moules pou tout l'monte ,

ou quéqu'fos un bouillon d'poule, cha ch'est pas vraimint un bon souv'nir, passeque maman al profitot de ch' bouillon bin gras pou nous faire purger à tour de rôle avec ed l'huile ed ricin, et croyez me cha faigeot effet
y avot aussi plusieurs fos par mos eune inspection de l'tête à g'noux sur un tiot banc, in s'penchot su les genoux de m'mère et al passot un peigne fort fin pour vire si in n'avot pas des poux ou des lentes,

 

in cas d'traces suspectes in avot drot à un bon lavache au savon noir et croyez me chétot fait d'manière énergique
el vermine chétot eune grande crainte pou maman, chés mat'las et chés lits i zétotent souvint inspectés, et min pére y brulot dins chés chambres des carrés d'soufre dins eune écuelle in fermant portes et ferniétes

, et au printemps in installot chés guirlantes à mouques dins toutes chés pièches, chétot pas biau mais chétot efficace

maman al supportot pas l'idée d'eune bestiole al maison !!!

 

Tiot Pierrot 6 

souv'nirs d'enfance de papa 1925 à 1930

j'avos à peine cinq ans quand pou l'première fos j'ai vu eune morte allongée dins sin lit avec eune bougie su l'tape ed chevet, chétot l'plus jeune ed mes tantes Bertha, morte d'eune phtisie galopante in trois s'maines,

al étot chez m'grand' mére et à coté de l'maison y'avot eune chouette qui arrêtot pas d'crier et y faigeot noir, j'étos pas rassuré
j'éto souvin malate, mais chétot jamais trop graffe et j'étos bin soigné par ch'méd'cin des mines, i avot gramin d'traval, payé et logé par chés mines i s'déplachot in vélo pou la moitié de l'population du villache,

i avot ker chés sous, et i suffiso d'mettre eune pièche sous l'première feulle de ch'carnet d'ordonnances pou avoir gramin d'médicamints
ch'chirop composé i étot fort bon et bin chucré, dins l'tisane in inl'vot chés tiots bout d'réglisse in bo

l'plus dur chétot l'huile ed foie d'morue d'norvége, al étot pas facile à avaler, j'aimo pas non pu ché sinapismes al farine ed moutarde, chétot l'manière ed nous soigner à l'époque !!!

 

Tiot Pierrot 7

chés fêtes vue par papa

el fête ed Noël al arrivot mais in savot qu'y aurot pas d'surprises à prévoir des juets in n'avto jamais eu al'maison

l'seul que j'ai eu ch'est les deux institutrices ou m'mére al faigeot l'ménache qui me l'avotent offert, chétot eune colombe in fer qui battot des ailes quand in l'tiroy avec eune fichelle, j'y t'no comme al prunelle ed mes yeux

(eune ed chés demoiselles al a fait l'école à tous chés filles de l'famille et sin mari à tous chés garchons)

pourtant maman al s'inringeot pour pas nous oublier
in s'levant in trouvot des friandises, eune brioche in forme ed Jésus, eune orange ou deux mandarines, un tiot paquet d'bonbons ou d'caramels mous, et in plus un bol ed chocolat,

 et croyez me in éto contints, in écouto minuit chrétiens ou il est né le divin enfant sur ch'phonographe ou cantés par maman qui étot fervente catholique et qui les connaichot par coeur,

et chest vrai qu'au fil de ch'temps in les a pas oubliés in les sait core par coeur chétot cha not' Noël et j'y pinse core avec tendresse

 

 

Tiot Pierrot 8

 nouvel an
j'vénos d'avoir cinq ans, chétot nouvel an et pou l'première fos, j'allo avec mes deux fréres étrenner mes zoncles et tantes et m'grand mére

l'matin de ch'jour là aprés avoir souhaité eune bonne année à nos parints, astiqués de l'tiéte aux pieds, eune tiote malette avec un cordon pindue à not'cou et muchée sous not' quémiche, in prenot l'départ d'un long parcours
in allot chez chés fréres et chés soeurs à m'mére, dins chaque maison in avot presque toudis des gauffes sèches et eune paire ed bonbons

mais pou nous l'principal chétot l'pièche des zétrennes, eune pièche in nickel ed vingt cinq centimes avec un tro au milieu, in nous faigeot souvint attindre jusqu'à not' départ pour nous l'donner !!
el dernière ed mes tantes à visiter al habitot à l'aute bout du village y'avot au moins deux kilomètes à faire, in s'in r'n'allant in passot chez not' grand mére, al étot fort bonne et douche avec nous, in savot qu'in étot attindu avec un chocolat caud


su l'route du r'tour j'éto contint d'rintrer al maison, j'avo frod et j'éto fatigué, pindant qu'in étot partis, nos cousins et cousines y étotent v'nus al maison,

ch'est eune coutume qui s'perd un tiot peu d'plus chaque année et ch'est dommache, chétot eune belle habitute

in avot chacun eune boite in fer blanc perchée d'in tro chétot not'tir'lire in y mettot l'recette de l'journée, et d'main j'vous dirais à quoi al servot !!

 

 

Tiot Pierrot 9

au cinéma
chés sous des zétrennes i nous servotent pou aller au cinéma, quand min pére i voulot bin nous y conduire, in ch'temps la l'intrée al coutot quinze centimes
y'avot deux films muets sous titrés, et un pianiste qui accompagnot chés temps forts à l'intracte, min pére i sortot boire un verre et i nous rapportot des cacaoétes, in étot gramin d'infants dins ch'cinéma
in aimot bin ché films d'cow boys, ed mousquetaires, ed corsaires, in riot bin avec Buster Keaton, Charlot, Max Linder, y'avot des séances à peu prés six fos par an

       
el lend'main dins chés rues in juot à l'épée, à l'arc, in faigeot semblant d'tirer au pistolet, in imitot nos héros

su l'plache y'avot quequ'fos un cinéma ambulant ténu par des forains, mais y'avot pas gramin d'gins qui y'allotent !

 

Tiot Pierrot 10

 

quand ch'printemps i arrivot aprés qu'mes fréres i zétotent rintrés d'l'école, les infants de ch'quartier i s'artrouvotent dins ch'quémin qui ménot à ché camps et là in juot aux cartes, aux osselets, aux billes, al'toupie

     

i suffisot d'eune dizaine ed boites ed conserfes et d'un gros caillo pour qu'in jue tout l'aprés midi al pyramide, in s'disputo rar'mint in étot vraimint amis
ch't'année là, min frére Gaston qui étot fort économe et qui avot réussi à mettre gramin d'pièches ed coté in rindant des services à ché voisins, aprés avoir eu l'accord de note mére , i avot racaté à un d'ses copains un uniforme ed scout

chétot sin rêve d'puis qui les zavot vu défiler au pas cadencé à eune fête dins ch'villache

comme i étot pas gros, ch'pantalon i étot trop larche et ch'capio aussi, mais i étot tell'min fier du haut d'ses onze ans

tous chés zinfants l'app'lotent chef et i l'saluotent in mettant deux dos su leur front, comme i étot louv'teau in l' faisot inrager mi et min frére Jean in hurlant comme des loups
deux s'maines plus tard i s'étot inscrit à l'musique de l'fanfare, i donnotent chés zinstruments et comme i avot pu qu'cha i avot eu un tambour

i répétot tous les jours à l' maison et chétot pas triste, in a bin ri pindant chés momints la pourtant Gaston chéto l'meilleur des frères pour nous,

la i savot qu j'allo bétot rintrer à l'école bin tous les jours y m'apprénot l' français sur eune ardoise, et ch't'année là in allot avoir eune surprisse din ch'quartier !!

 

Tiot Pierrot 11

 

el surprise de ch'printemps 1930 ch'est l'éléctricité, al a été installée in qué'ques semaines par des zouvriers de ch'nord qui parlotent pas l'même patois qu'nous
dins chaque chambre in avot eune ampoule et un abat jour in fer vert et blanc in d'sous

el surprise de ch'printemps 1930 ch'est l'éléctricité, al a été installée in qué'ques semaines par des zouvriers de ch'nord qui parlotent pas l'même patois qu'nous
dins chaque chambre in avot eune ampoule et un abat jour in fer vert et blanc in d'sous

in plus al cour su ch'mur prés d'not' fenétre i z'avotent aussi mis eune lampe, et l'soir din not' chambre in n'avot pas b'soin d'allumer pour lire
cha nous cangeot de l'lampe à pétrole, mais cha accentuot l'pauvreté de l'maison avec chés meubles in bos blanc et ch'papier jauni sur ché murs

ou l'vielle chaise longue qui nous servot quand in éto malates, et l'situation al s'améliorot pas vu qu'in parlot déjà d'chomage dins les mines
avec ch'printemps in veyot arvénir chés marchands ambulants, ch'marchand d'lait, d'pichon, li je m'rappelle qui criot "moules moules moulette, moules toutes fraiches" ,

  Photos Internet

chés marchands d'loques avec leur cloche, et comme tout cha cha s'déplachot dins des voitures tirées par des bidets, ch'livreur ed biére li i n'avo deux, aussi in veyot chés zinfants avec un séau eune pelle et eune brosse qui s'impressotent et d' ramasser ch'précieux crottin !!

 

 

Tiot Pierrot 12

 

ché corons y s'rimplichotent ed travailleurs étrangers surtout polonais
mes voisins polonais sd'origine i parlotent pas un mot d'français, i zavotent trois infants, un garchon dem'n'ache et deux tiotes filles , comme in allot pas à l'école mi et ch'tiot Sylvestre in est dev'nus camarates

j'l'appreno à parler français, et sans m'in rindre compte, j'ai appris l'polonais, j'étos fort apprécié dins l'famille, faut dire que j'étos seul à y aller
 ch'père Jean travaillot à percher ché gal'ries d'fosse "in bowette", i portot su s'mine el trace d'un traval dur et insalubre,

 

i devot décèder douze ans plus tard de l'silicose, qu'in app'lot alors l'asthme de ch'mineur aprés avoir bin souffert, chétot un homme doux qui portot déjà l'trace ed ses efforts et minquot d'respiration
el mére trés douche avec mi, étot dure et méchante avec ses zinfants Sylvestre, Adéle et Iréne, et al hésitot pas à les taper avec eune cheinture ou un martinet

j'avos du mal à comprindre pace qu'al étot gentille avec mi
un biau jour y'a un cousin de l'femme qu'y est arrivé comme locataire, i étot jeune y'avo vingt cinq ans, i travaillot al fosse et i payot eune pinsion à chés voisins

in plus i avot installé un atelier d'réparations ed montres reveils pindules horloches, et i a eu rapid'mint gramin d'clients

                     

y s'app'lot Alex et li non pu i parlot pas français et i riot aux éclats quand j'i digeo bonjour ou aur'voir in polonais
ach't'heure ch'temps i m'étot compté pou l'intrée à l'école, mais j'avos pas d'craintes, l'école al étot à cinq cent métres de m'maison, et j'intindos ché zinfants juer al récréation et j'auros voulu être avec eux

 

 

Tiot Pierrot 13

au printemps in veyot aussi arriver cheux qu'in app'lot chés "baraquins"

i'z'arrivotent avec leurs roulottes in bos et s'installotent in rond su l'tiote plache y z'étotent pas bin vus, in les craignot, chés vieux y digeotent "rintrez vos glaines v'là ché rapineux"

y zétotent gramin et connus pou voler tout c'qui pouvotent

chés z'hommes y réparotent ché culs d'caudrons ou d'lessiveuses, et chés femmes al z'allotent ed porte in porte pour vindre des paniers in osier ou des wassingues,

al profitotent pour mendier ou dire l'av'nir, i z'étotent sales et leurs longs cotrons i sintotent el fumée

i restotent pas longtemps ch'garde champétre i les faigeot décamper, et pou nous z'impécher d'aller les vire in nous digeot qui vindotent ché tiots zinfants!!!
  

                    

Peinture à l'huile sur panneau d'isorel de Lucien Louis Niorthe en 1952.

et voilà j'ai retranscrit au mieux le dernier cahier de papa après il a arrêté d'écrire, il était malade et fatigué .Toutes les personnes citées sont décédées, c'était une génération complète de travailleurs des mines
J'ai eu la surprise au milieu du cahier de trouver ces mots écrits en grandes lettres

"le 15 janvier à 24 heures la guerre était déclarée dans le golfe persique " ce petit texte couvrait tout une page !!!!

 

Annie Dedourge Paillot