VIVE SAINT ELOI        Retour à la page du chti

Fleurs d'en bas: 1897de Jules Mousseron

I

Ouverriers métallurgistes

Gins souvint pus contints qu' tristes

Amusons-nous !

Laissons-là l'acier et pis l' tôle,

Aujourd'hui, ch'est l' jour qu'in rigole,

Rions donc comm' des fous !

Amis, perdons l' plaisi d'un roi !

Crions tertous : « Viv' Saint Eloi ! »

II

Saint Eloi, quéqu'fos sévère,

Va déquindre au soir d'sus tierre...

Frèr's, in buvra !

Parç' que l' saint va mettr' dins s' carrette

Ch'ti qu'au soir i n' s'ra point pompette,

A l'infer i l' mén'ra.

Amis, perdons l' plaisi d'un roi ;

Crions tertous : « Viv' Saint Eloi ! »

III

Saint Eloi, ch'est un bon zique.

Il aim' bin l' canchon comique

Frèr's, in cant'ra !

Au pus fin diseux d' chansonnettes,

L' grand saint va payer des canettes

Queu plaisi qu'in ara !

Amis, perdons l' plaisi d'un roi ;

Crions tertous : « Viv' Saint-Eloi ! »

IV

L' grand Saint Eloi, qu'aim' les danses,

Va donner des indulgences

Frèr's, in dans'ra !

Ch'ti qui j't'ra mieux ses pieds d'sus s' tiête

Au paradis s' plache allé est prête ;

Sans chopper il ira.

Amis, perdons l' plaisi d'un roi

Crions tertous : « Viv' Saint Eloi ! »

V

Saint Eloi, qu'aime et jeunesse,

Va veiller d'sus nou maîtresse ;

Frèr's, in aim'ra !

L' fille amoureuse, et saint i l' cange

Et li donn' tout's les grâc's d'un ange.

Beaucop d'ang's in verra.

Amis, perdons l' plaisi d'un roi ;

Crions tertous : « Viv' Saint Eloi ! »