LETTRE A MIMILE Retour à la page du chti
SUR LES TRANSFORMATIONS DE LA VILLE DE LILLE
De Desrousseaux
L'aut' fos, min cousin Mimile,
Soldat parti pour sin tour,
A fait savoir à s' famille
Qu'i' vient d'êt' nommé tambour.
Comme i' d'mandot des nouvelles
Du pays, bien intindu,
J'ai dit : « J' vas t'in dir' des bielles ! »
Et sitôt, j'ai répondu
« Tout d'puis qu' t'es,
Mimile, Dins tin régimint,
Nous avon', à Lille,
Chaq' jour du cang'mint. »
« Te sais, cheull' fameuss' guinguette,
Uch' que nos pèr's, nos taïons,
Comm' nous-mêm's, les jours de fiête,
Ont dansé tant d' rigodons !
Cheull, pauv' Nouvielle-Avinture 1
On l' la démolie, un jour...
I' n'in reste qu'eun' gravure,
Que j' te f'rai vir à tin r'tour.
« Tout d'puis qu' t'es,
Mimile, Dins tin régimint,
Nous avon', à Lille,
Chaq' jour du cang'mint. »
« L' ru' de 1' Nef et l' ru' d' Termonde,
Comme l' Marqué-au-Verjus,
Sont passés dans l'auter monde,
On n'in parle déjà pus.
Et chés gargott's de l' Grand'-Plache
L' Maurien, l' Tiêt'-d'Or, les Quat'-Cœurs 1
On n'in vot pus même l' plache...
Les gargotiers sont ailleurs.
« Tout d'puis qu' t'es,
Mimile, Dins tin régimint,
Nous avon', à Lille,
Chaq' jour du cang'mint. »
« Te n' verras pus l' vieux Calvaire,
Uch' qu'infant, t'allos, min fieu,
Les Jeudis Saint', avé t' mère,
Bajer les pieds du bon Dieu.
Te n' verras pus l' Port' de l' Barre,
Ni l' rempart de ch' côté-là,
Par un jour, sans crier : Gare !
On a culbuté tout cha.
« Tout d'puis qu' t'es,
Mimile, Dins tin régimint,
Nous avon', à Lille,
Chaq' jour du cang'mint. »
« I' n' faut point, fieu, qu' te t'inf'noulles,
Mais t'aras biau voyager,
Pour trouver l' Poste-à-Gernoulles,
Uch' que nous allîm' nager ; ;
Te n' verras pus... Mais, j' m'arrête...
Pour dir' tout chin qu'on défait,
I' m' faudrot t'écrire eun' lette,
Gross' comm' eun' bail' de café.
« Tout d'puis qu' t'es,
Mimile, Dins tin régimint,
Nous avon', à Lille,
Chaq' jour du cang'mint. »
« Mais, fait à fait qu'on culbute
Du vieu', on r'fait du nouviau ;
On rimplach' tout' vieil' cahute,
Par un bâtimint fort biau ;
On n' vot pus qu' des ru's nouvielles,
Et qui dégott'nt, pou' l' largueur,
Jusqu'à nos ancienn's, si bielles !
Les ru's d' Five' et d' Saint-Sauveur.
« Tout d'puis qu' t'es,
Mimile, Dins tin régimint,
Nous avon', à Lille,
Chaq' jour du cang'mint. »
« On fait des boul'vards, des plaches,
D' tous côtés des biaux gardins ;
Des mason' à quate étaches,
Avec des grands magasins ;
Des log'mints comm' pour des princes...
S'il est vrai, l' dicton qui dit
« Qui bâtit, pâtit ! ... » te pinses,
Si dins no' ville on pâtit !
« Tout d'puis qu' t'es,
Mimile, Dins tin régimint,
Nous avon', à Lille,
Chaq' jour du cang'mint. »
« Un p'tit mot pour nos artistes
Comm' tout l'univers, te sais
Ou' nos joyeux orphéonistes
Ont vaincu les Bordelais.
Pour qu'on s' rappelle ch'l affaire
Dins mille ans, apprinds, garchon.
Qu'eun' ru', qu'on est in train d' faire,
S'appelle l' ru' d' l'Orphéon 1
« Tout d'puis qu' t'es,
Mimile, Dins tin régimint,
Nous avon', à Lille,
Chaq' jour du cang'mint. »
« Infin, min fieu, pour mieux dire,
On r'tourne tout dins ch' pays.
Qui d'viendra, j'ose l' prédire,
Comme un coin du paradis.
Dins vingt ans, s' biauté, Mimile.
F'ra dir', dins tout l' monde connu
« Qui n'a point vu l' vill' de Lille,
Est eun' gin qui n'a rien vu ! »
« Ah ! d'puis qu' t'es, Mimile,
Dins tin régiment,
Nous avon', à Lille, C
haq' jour du cang'mint. »