LE PETIT DOIGT                Retour à la page du chti

 

d'Alexandre Desrousseaux

 

 

Tout in halochant s'tiète,

M'bonn’ vieil' gra' mère, un      jour,

M'a dit comm' chat Colette,

Quoi ! te pinse a l'arnour !

Ah ! n' dis point que j' m'abusse,

Cha s'rot du temps perdu.

Quand min p'tit dogt raccusse,

Ch'est comm' si j'avos vu.

Min p'tit dogt plein d'esprit,

Par nuit, Min  p'tit dogt me l' l'a dit,

Min p'tit dogt :plein d'esprit ,

Par nuit, Min p’tit dogt me l’ vla dit

 

« J'ai su par li, sans peine,

Qu'à l' ducass' Saint-André,

Avecque s' sueur Mad'leine,

T'as rincontré D'siré.

Ch' luron, sans fair' l'etnielle

Profitant d' l'occasion,

T'a gliché dins l'orelle

Eun' biell' déclaration. »

Min p'tit dogt plein d'esprit,

Par nuit, Min  p'tit dogt me l' l'a dit,

Min p'tit dogt :plein d'esprit ,

Par nuit, Min p’tit dogt me l’ vla dit

 

 

 « Tin coeur a fait douq' douque,

Et sans 1' savoir, tes' yeux

Sont v'nus pus grands que t' bouque,­

Pour vettier ch' malicieux.

Mais t' n'as point su, Colette,

Li dire un non, brav'mint.

Alors l'affaire est faite,

Car qui n' dit mot, consint. »

Min p'tit dogt plein d'esprit,

Par nuit, Min  p'tit dogt me l' l'a dit,

Min p'tit dogt :plein d'esprit ,

Par nuit, Min p’tit dogt me l’ vla dit

 

 

« Et- d'puis, t' n'as pus d' corache,

T'as perdu t'n appétit,

T'as perdu tin riache,

T'as mêm' perdu t'n esprit.

Tout l' jour, tout l' nuit, cha dure,

T'as toudis d'vant tes yeux

Eun' malheureuse' figure...

Ch'est cheull'.de ch'l injoleux ! »

Min p'tit dogt plein d'esprit,

Par nuit, Min  p'tit dogt me l' l'a dit,

Min p'tit dogt :plein d'esprit ,

Par nuit, Min p’tit dogt me l’ vla dit

 

 

« Mais te cess' d'êt' chagrine

Sitôt qu' t'es-t-avec li.

Te marche' à la badine,

T'acout' sin paroli.

I' t' fait des biell's promesses,

Hélas ! un jour viendra

Qu'i' s' lass'ra d' tes caresses.

Et puis qu'i' t' laich'ra là ! s

Min p'tit dogt plein d'esprit,

Par nuit, Min  p'tit dogt me l' l'a dit,

Min p'tit dogt :plein d'esprit ,

Par nuit, Min p’tit dogt me l’ vla dit

 

 

J'ai répondu sans rire

« Gra'-mère j' vous dirai

Dins chin qu' vous v'nez de m' dire

I' n'y-a qu' la mitan d' vrai.

D'siré, d'un air bénache.

A c' soir dot justemint

Me d'mander in mariache...

I' n' faut qu' vo' consint'mint. »

« Vo' p'tit dogt plein d'esprit,

Par nuit,                                                 

 Vo' p'tit dogt plein d'esprit,

Par nuit,                                                 

N' vous a donc point tout dit ? »