L' BRAD'RIE                                Retour à la page du chti

Sur un sujet vieux comme Hérode

J’vas vous dir’des couplets nouviaux

Quoiq’ sur un air qui n’est pas d’modé

J’esper’ qui n’in s’ront point moins biaux

Un homm’ qu’on r’nomme

D’Lille jusqu’à Rome

Sur min sujé’ in fait un biaux tableau

Chacun i l’admire

Et n’cesse d’dire

Ch’est un fameux lapin que l’pere Wattiaux

Sans vous nommer m’canchon du reste

Vous sarez d’chin que j’veux parler

Quand vous allez m’intind’ crier

Vite à l’brad’rie au reste                          (bis)

Awi, j' veux vous canter L' BRAD'RIE !

Lille, ch' jour-là, n'est qu'un marqué.

Car tous cheuss' qui ont de l' vieus'rie.

S' dépêch't'nt à s'in débarrasser,

Les pauv's, les riches,

Vind'tent des q'miches.

Bonnets, giliets, mantiaux, cauche' et sorlets,

Capiaux, capotes,

Ecourcheux, bottes,

Et, pour mieux dir', tous séquois bien bradés.

Les païsans sont les pus lestes,

A fair' leus approvisonn'mints,

Quand il' intind'nt crier chés gins

Vite à I' Brad'rie ! Au reste ! ! !                             (bis)

Les Lillo' ont l' goût du commerce.

Ch'est un n' séquoi qu' tout l' mond' sait bien.

 Il arot biau pleuvoir à l' verse,

Qu' pou' l' Brad'ri' cha n' f'rot presque rien.

J'ai vu des filles

Vind' des guénilles

Qui l' velle incore, étott'nt au Mont-de-Piété,

Et chés sossottes,

N'n acater d's autes,

Et du mêm' jour aller les ringager...

Au coin d'eun' ru', l' graingnard MODESTE,

In moutrant s' femme et ses infants,

Criot d' bon coeur à les passants

 Vite à I' Brad'rie ! Au reste !!!                                                            (bis)

On fait des farce' à pouffer d' rire,

Quand on rincontre un vrai paour.

In v'là un qui vient sans mot dire.

Un farceu va li dir' : « Bonjour !

Ch'est vous, Nicole ?

Ah ! su' m' parole,

Je n' pinsos point d' vous rincontrer, m'n ami. »

D'un air tout bête,

Ch' pacoul le r'vette,

Et l'aut' li dit : « Nicol' quemint va-t-i ? »

Mais... cha va intre l' ziste et l' zeste,

Répond ch' brave homme d' païsan.

On li donne un grand renfonc'ment !...

Vite à l' Brad'rie ! Au reste ! ! !                      (bis)

Incore in train d' rir' de ch'l affaire,

Du coin d l' ru' des Banséliers

J' vos v'nir des homme', et puis, derrière,

Des femm's, des fill's, des marmouzets.

A leus paroles,

Leus airs si drôles,

J' vos qu'i' s'agit là d'un drôl' de séquoi.

J'accoste Ignace,

Mais, l' grand bonnasse,

M' dit tout bêt'mint : « J' ris sans savoir pourquoi. »

Je r'marque alors un homme in veste,

Et j' vos qu'on avot su' sin dos,

Avec du blanc, marqué chés mots

Vite à I' Brad'rie ! Au reste ...           (bis)     

Pour quéq's sou' on a des défroques

D' quoi s' fair' des drôl's d'accoutermints,

Ch' n'est point brillant, non, ch' n'est qu' des loques.

Mais ch'est tout d' mêm' des déguis'mints.

Pour faire l' rinse,

On s' mé' in prince,

Ni pus ni moins qu' si ch'étot l' carneval ;

Des dintellières

S' mett'nt in bergères,

Et, l' long de l' ville, i' fait'tent baccanal.

Ch'est à qui f'ra l' pus drôl' de geste,

Avec sin costume à tassiaux ;

Ch'est à ch'ti qui crîra l' pu' haut

Vite à l' Brad'rie ! Au reste ! !                          (bis)

Ah ! mon Dieu, qu'elle est drôl' cheull' fiête

Mais pour faire eun' pareil' canchon,

Je n' vous l' cach' point, vraimint, je r'grette

D' n'avoir point l'esprit d', BRUL'-MASON.

Ch' Lillo' habile,

Qui n'n a fait mille,

Ch'est comm' un sor', i' n'a point fait cheull'-là.

Mais, faut' de 1' sienne,

J' vous offre 1' mienne,

L' pus biell' des fille' n' donn' que chin qu'elle a.

Si m' canchon fait l'effet d'eun' peste,

Si vous s' sauvé' in l' l'intindant,

Vous n'arez qu'à l' vinde in criant

Vite à l' Brad'rie ! Au reste ! ! !                             (bis)