Le jour des noces Retour à la page du chti
Quand on m’ dit qu'ch'est un biau jour
Que l'premier jour du mariache,
Pour fair' cesser ch'bavardache
J’vo-dros donner un rambour.
On peut sout'nir, au contraire,
Qu'on a dins ch jour si fameux,
Quarant' fos l'occasion d'braire,
U bien d's'arracher les ch'veux !
L 'jour des noces , l'jour des noces,
Ah ! qu'on vot des drôle de cosses !
L'jour des noces, l’jour des noces
On n’a ni joi ni plaisi !
Vous s' levez d'un grand matin,
L' coeur serré comme un coupable.
On dirot vraimint que l' diable
Vous souffle un méchant destin,
Car à vos yeux tout s'imbroule,
Vous n' savez qu' faire de vos mains ;
Vous avez tout l'air d'eun' poule
Au mitan d' trint'-six pouchins.
L'jour des noces, l’jour des noces
On n’a ni joi ni plaisi !
Tout d'un cop, vous intindez
Que l' caroche est à vo' porte !
Vous vodris' bien faire in sorte
D'êt' point vu, quand vous montez
Point moyen : tout l' voisinache
Vous attind là p'puis longtemps,
Afin d' parler d' vo mariache
Et d' faire eun' masse d' cancans
L'jour des noces, l’jour des noces
On n’a ni joi ni plaisi !
L'un dit : « Ch'est un bambocheu !
Laut' dit : « Ch'est un capenoule !
S' femme ara pu d'eun' tatoule !
I' li tir'ra pus d'un ch'veu ! »
« Bah ! répond vite eun' sott' brouche,
I' n' f'ra pus tant sin mutin,
Car avé s'n air saint' mitouche,
S' femm' rindra du burr' pou' l' pain (a).
L'jour des noces, l’jour des noces
On n’a ni joi ni plaisi !
L' cocher vous fait débusquer
A l' mason d' vo' prétindue,
Qui paraît tout' confondue
D'êt' vu' près d' sin perruquer...
Vous êt's prêt d' querre in faiblesse,
Vous sintez fraiquir (3) vos yeux,
Quand vous veyez qu' cheull' maîtresse
N'a su' s' tiête que des faux ch'veux.
L'jour des noces, l’jour des noces
On n’a ni joi ni plaisi !
Il est trop tard de r'culer,
D'invoyer tout fair' lanlaire,
Vous allez d'vant monsieur
l' maire Pour toudis vous incainner !
Tout l' monde alors fait s' grimace,
Et vous promet du bonheur...
A chaq' fos qu'on vous imbrasse,
Ch'est un cop d' poingnard dins l' caeur.
L'jour des noces, l’jour des noces
On n’a ni joi ni plaisi !
Les ouveriers, par malheur,
(I' n' faut rien dir', ch'est l'usache),
Ont toudis dins leu mariache,
Un vaurien d' garchon d'honneur (').
Un p'tit ferluquet tout blême,
Qui va d'zous l' table à pas d' loup,
Pour inl'ver l' guertier d' vo' femme,
Fourrer ses mains tout partout !...
L'jour des noces, l’jour des noces
On n’a ni joi ni plaisi !.
On vous r' conduit deux par deux,
In avant marche l' musique.
Jusqu'à vo' mason tout l' clique
Cante : Où peut-on être mieux ?
Infin vous v'là tout bénache
D' goûter un bonheur parfait l...
Pour un qui trouve d' l'ouvrache,
Pus d'un chint vott'nt qu'il est fait !
L'jour des noces, l’jour des noces
On n’a ni joi ni plaisi !