Carnéval             Retour à la page du chti

 

1

Ch’est Carnéval, ch’est l’ pus bell’ fiête!

Qu’à bin s’amuser in s’apprête!

Aujord’hui, point d’lim’, point d’ martiaux.

I n’ faut point d’ouvrach’, point d’ patiaux.

Ch’est un plaisi qui vient d’ nos pères.         

Ch’est pour oblier nos misères.

Tâchons d’ prindre un drol’ dé vêt’mint,

 

Refrain

                                                   

Et rigolons tertous s’qu’à d’main.

Qu’in cant’, qu’in danse à volonté,

Qu’in cant’, qu’in danse à volonté.

El jour ed Carnéval,

Ah.queulgrémint d’êtr’ masqué!

Jétons, Pierrots, Pierrettes,

Nos pieds au d’sus d’nos tiêtes.

Dins l’ vill’ comme au bal,

Qu’in intinch’ rir’ pa tous tés!

Amis, n’ pinsons foque à l’ gaité.

Vive el gaité! Vive el gaité!

  Amis, n’pinsons foque à l’ gaité.

  Crions: Vive et gaité!

2

Les uns mettront des loques. ed femme.

Pou n’point paraitr’ du même,

Qu’in sort’ tout’ les viés’ri’s d’dins l’temps,

Crinolin’s et capiaux montants.

Et l’ cheu qu’il est un peu pus riche.

Qu’ si dépins’ des sous i s’in fiche,

I s’mettra marquis ou pierrot

 

3

Aujourd’hui dins l’ ville in promène

Un Boeuf-Gras si gros qu’eun’ baleine...

Un bon bravo pou nos bouchers

Qui veut’nt égayir nos quartiers.

Souhaitons qu’in délivr’ gratuite

L’ viand’ du boeuf pou mett’ dins l’ marmite

Des famill’s les pus pauv’s d’ichi

Cha s’ra pour euss’ un vrai frichti !

  

4

Tous les bons vieux pères d’ famille

Qui s’ récauff’nt-té tout près d’ leu grille,

I verront vir à leus peignons,

Pindant qu’ leus femm’s front des ratons.

Ils arpins’ront à leus fardaines ;

Ils artrouv’ront leus jonn’s haleines.

Ces jours-chi, ch’est permis d’êtr’ fous,

Et les vieux cant’ront avec nous

 

5

Mais d’main cha s’ra l’ pus trist’ passache,

Quand in verra les loqu’s d’ouvrache !

In n’ sara pus ouver’ ses yeux.

In ara du mau dins ses ch’veux.

Contre et fatigue in f’ra la lutte ;

Mais cha s’ra l’affair’ d’eun’ minute,

Quand dins s’ tiéte in ara l’écho

Qui répét’ra cor pus d’un cop

 

                Mousseron